विद्युत उत्पादन

हाम्रो विद्युत उत्पादन लक्ष

हाम्रा बिजुलीविज्ञहरूले कहिले कही हामी सोझो हिसाब गर्नेलाई अलमल्ल पारिदिन्छन् । एकातिर घोषणा गर्छन् कि ३ वर्षपछि लोडसेडिङ हुदैन त अर्कोतिर कसरी हुदैन त ? भन्दा यसमा आधरहरू पर्याप्त दिदैनन् । हामीले भेटेसम्मका तथ्याङ्कले अहिले हाम्रो स्थापित विद्युत क्षमता(installed electric capacity) ७०० मेगावाटको हाराहारीमा छ । हिउदका दिनमा लोडसेडिङ हुदा हामीले एक दिनको सक्रिय समय विहान ५ बजेदेखि बेलुका ९ बजेसम्मको १६ घण्टाको समयमा जम्माजम्मी एक तिहाइ समय बिजुली पाएका थियौ । अर्को शब्दमा भनिदा त्यो सक्रिय समयको एक समयमा देशका बिजुलीका एक तिहाइ उपभोक्ताले मात्र बिजुली पाएका थिए । बाँकी दुई तिहाइ उपभोक्ता बिना बिजुली बसेका थिए । सोझो हिसाबमा ती दुई तिहाइ उपभोक्ताको निम्ति हालमो क्षमताको दुई गुणा अर्थात् १४०० मेगावाट क्षमताको आवश्यकता पर्ने देखिन्छ । दिइएका तथ्याङ्क अनुसार तीन वर्षमा वृद्धि हुने क्षमता ७०० मेगावाट पनि नाघ्दैन त बाँकी ७०० मेगावाट आउने ठाउँ पनि छैन । सो बाहेक वर्षेनी १०० मेगावाटका ग्राहक थपिई रहन्छन् । त्यो हिसाबले अर्को तीन बर्षमा ३०० मेगावाट माग यसै पनि बढ्छ । यसरी हामी तीन वर्षमा २४०० मेगावाटको आवश्यकतामा पुगिसक्छौँ । पर्याप्त बिजुली प्राप्त हुन्छ भन्ने जानेपछि घरेलु विद्युत उपकरणहरू वृद्धि हुन्छन् र उद्योगहरूले पनि विद्युत उर्जाको माग गर्दछन् । त्यसैले अर्को १० वर्षमा विद्युत माग कम्तिमा पनि ४००० मेगावाट त हुन्छ नै । त्यसैले यो दशकमा ५ हजार मेगावाट विद्युत उत्पादनको लक्ष राखेर राज्यका स्रोतहरू त्यतैतिर केन्द्रित हुनु पर्छ ।