वसन्त(कविता)

अहो ! वसन्त आएछ

वसन्तको आगमनसँगै

छातीभित्र नया चाहना फक्रेछ

वर्षभरिको बुढौतीलाई बिर्साएर

नया बैँस बोलाई दिएछ ।

जाडोभरि नांगै बसेकी आरुमती

ढपक्कै फुलेर बैसवती भइछ

आफ्ना अङ्ग संसारलाई देखाएर

फूलैफूलले ढाकी दिइछ ।

बोलाउछ नया वर्षलाई वसन्त

बुढो वर्षतिर ढाड फर्काएर

प्रथम प्रेमिका पर्खने प्रेंमीझैँ

आशाका क्षणहरू केलाएर ।

धडकन बढ्दो छ धर्तीको

पानीको छाल उफ्रदो छ

उष्ण हुदि छ धर्ती पर्खाइले

आँशुको शीत वाफिदो छ ।

अहो . कति उज्यालो भए छ दिन

मन नै आज चंगा भए छ

वसन्तले उमङ्गसँगै

नौली प्रेमिका लिई आए छ ।

राम दाहाल

जोरपाटी १, काठमाडौँ

२०६९ चैत्र २१