कविता

मृत्युमहोत्सव

आज हामी छौँ उन्मादको चुलीमा,

मनाउदै छौँ मृत्युमहोत्सव आज;

आओ रथारूढ हुन विजेताहरू !

आओ समवेदना थाप्न पराजितरू !

सलामी दिदै छौँ आज

हामीले मारेकालाई,

सलामी दिदै छौँ आज

हामीले मराएकालाई;

सान्त्वना दिदै छौँ आज

जिउँदै स्वर्ग पठाएकालाई,

सान्त्वना दिदै छौँ आज

जिउँदै स्वर्ग देखाएकालाई ।

आओ उल्लास देखाउन विजेताहरू !

आओ शोक मनाउन पराजितहरू !

उन्मादको चुलीमा छौँ हामी,

मनाउदै छौँ मृत्युमहोत्सव आज ।

जीवन त मृत्युको संरक्षक हो,

अन्तिम थलोसम्म लिएर जान्छ;

मृत्यु त जीवनको अन्तिम उत्सर्ग हो,

जहाँ त्यागको अन्त्य हुन्छ;

समायोजन गर्‍यौँ हामीले दुवैको,

समागम पनि गरिदियौँ हामीले;

जीवन र मृत्युको दोसाँध

सधैँको निम्ति मेटाई दियौँ हामीले ।

आओ हर्ष देखाउन विजेताहरू !

आओ पिर बिसाउन पराजितहरू !

उन्मादको चुलीमा छौँ हामी

मनाउदै छौँ मृत्युमहोत्सव आज ।

के लिन्छौँ भनी मारेथ्यौँ ?

के दिन्छौँ भनी मराएथ्यौँ ?

भेटेनछौँ लिन केही

सकेनछौँ दिन केही

तैपनि सोचेछौँ – ‘लियौँ, दियौँ’

हारजितका गाथा बनाएछौँ

विजेता विजित मलामीलाई

महोत्सवभागी बनाएछौँ ।

आओ हर्ष देखाउन विजेताहरू !

आओ पिर बिसाउन पराजितहरू !

उन्मादको चुलीमा छौँ हामी

मनाउदै छौँ मृत्युमहोत्सव आज ।

-- राम दाहाल

२०६९ कार्तिक ११